RYTN-in «boz kardinalı» hesab edilən İltimas Məmmədov milyonları göyə sovurub Əvvəllər Məhəmməd Məmmədovu özünə ağsaqqal seçən nazir müavini indi hansı nüfuzlu şəxsin adından istifadə edir?
Bildiyiniz kimi, Rabitə və Yüksək Texnologiyalar Nazirliyinin, onun struktur qurumlarının və tabeçilikdə olan müəssisə və əlaqəli şirkətlərin ayrı-ayrı rəhbər vəzifəli şəxsləri tərəfindən vəzifə səlahiyyətlərindən sui-istifadə, mənimsəmə və yol verilmiş digər qanun pozuntuları faktları üzrə Cinayət Məcəlləsinin müvafiq maddələri ilə başlanmış cinayət işi üzrə Baş prokuror yanında Korrupsiyaya qarşı Mübarizə Baş İdarəsində istintaq-əməliyyat qrupu yaradılmaqla istintaq aparılır. Dövlət əmlakının sistemli şəkildə mənimsəmə və israf etmə yolu ilə talanması məqsədi ilə rollar bölüşdürülməklə qeyd olunan qurum və şirkətlərin ayrı-ayrı vəzifəli şəxslərindən ibarət korrupsiya şəbəkəsi təşkil olunaraq büdcə vəsaitlərinin talanması istiqamətində çoxsaylı korrupsiya sxemləri həyata keçirilib. Korrupsiya şəbəkəsinə daxil olan vəzifəli şəxslər tərəfindən dövlət büdcəsi vəsaitləri hesabına maliyyələşmiş layihələrin yaxın qohumlarının adına rəsmiləşdirilməklə faktiki özlərinə məxsus şirkətlər tərəfindən həyata keçirilməsinin rəsmiləşdirilməsi barədə saxta sənədlərin tərtib olunması, görülən xidmətlərin dəyərinin dəfələrlə şişirdilməsi, faktiki yerinə yetirilməmiş xidmətlərə görə ödənişlərin həyata keçirilməsi və sair yollarla külli miqdarda dövlət əmlakını mənimsəmə və israf etmələri aşkar edilib. Belə ki, həyata keçirilmiş istintaq-əməliyyat tədbirləri ilə Bakı Telefon Rabitəsi İstehsalat Birliyinin baş direktoru Beytulla Hüseynovun 2009-2015-ci illərdə arvadının təsisçisi olduğu "Bakı Rabitə Təmir Tikinti” və "Təmir Təchizat Servis” MMC-lərinin direktoru Bayram Vəliyev, yaxın münasibətlərdə olduğu "3 nömrəli Rabitə Təmir Tikinti”, "Rabitə Mülki Tikinti” MMC-lərinin direktoru Emin Məmmədov və birliyin baş mühasibi Anar Mustafayevlə qabaqcadan əlbir olub yeni rabitə xətlərinin çəkilməsi, binaların, qurğuların təmiri-tikintisi və sair işlərin yerinə yetirilməsi üçün onların hesablaşma hesablarına köçürüləcək pul vəsaitlərinin işlərin həcmindən asılı olaraq 35-45% həcmində hissəsinin nağdlaşdırılaraq B.Hüseynovun özünə verilməsi barədə razılığa gəliblər. Bundan sonra B.Hüseynov tabeliyində olan qovşaqların formal olaraq keçirdikləri tenderlərdə vəzifə saxtakarlığı ilə həmin məhdud məsuliyyətli cəmiyyətlərin qalib elan olunaraq müqavilələr bağlanmaqla və faktiki işlərin tam icra olunmadığı halda, o cümlədən internet xidmətinin təmin edilməsi üçün fiber-optik kabel xətlərinin çəkilişi zamanı işlərin faktiki olaraq telefon qovşaqları tərəfindən aparıldığı halda guya həmin işlərin faktiki özünə məxsus olan müəssisələr tərəfindən görülməsi və işlərin həcminin artırılması barədə saxta sənədlərin tərtib edilməsi yolu ilə adıçəkilən MMC-lərin hesabına köçürülmüş ümumilikdə 71 milyon 263 min manat məbləğində vəsaitin 21 milyon 379 min manatını mənimsəməklə dövlətin qanunla qorunan mənafelərinə ağır nəticələrə səbəb olan zərər vurmalarında şübhələr üçün əsaslar müəyyən edilib. Bununla yanaşı, nazirliyin Aparat rəhbəri Vidadi Zeynalovun qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə qabaqcadan razılaşmaqla həmin strukturlar tərəfindən işlərin görülmədiyi, tam yerinə yetirilmədiyi, avadanlıqlar alınmadığı, istifadə olunan avadanlıqların, xidmətlərin qiymətlərinin isə 4-5 qat şişirdilməsi və digər üsullarla işlərin və xidmətlərin guya yerinə yetirilməsini özlərinin himayə etdikləri, yaxın münasibətdə olduqları şəxslərin adına olan özəl şirkətlər tərəfindən saxta sənədlər əsasında rəsmiləşdirməsini təmin etməklə müvafiq müəssisələrin ayrı-ayrı banklardakı hesabına köçürülmüş 73 milyon 590 min manat pul vəsaitinin nağdlaşdırılmaqla mənimsənilməsini və israf edilməsini təşkil etməsində şübhələr üçün əsaslar müəyyən edilib. Cinayət işi üzrə nazirliyin strukturuna daxil olan "Aztelekom” MMC, "AzİnTelekom” MMC, "Azərpoçt” MMC, Məlumat Hesablama Mərkəzi və özəl şirkət "Optik Rabitə Tikinti və Quraşdırma” MMC-nin fəaliyyətində də mənimsəmə və israf etmə, vəzifə səlahiyyətlərindən sui-istifadə və vəzifə saxtakarlığı faktları müəyyən edilib. İş üzrə Beytulla Hüseynov, Anar Mustafayev, Emin Məmmədov, Bayram Vəliyevə və "Aztelekom” MMC-nin baş mühasibi Oktay Rüstəmova Cinayət Məcəlləsinin 179.3.2 (külli miqdarda mənimsəmə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), Vidadi Zeynalova, həmçinin "AzİnTelekom” MMC-nin baş direktoru Cəlil Cəfərova, "Azərpoçt” MMC-nin baş direktoru Qəmbər Bəybalayevə və "Optik Rabitə, Tikinti və Quraşdırma” MMC-nin direktoru Namazalı Məmmədova həmin məcəllənin 179.3.2 və 308.2-ci, MMC-nin baş mühasibi Səhrab Hümbətova isə 179.3.2, 308.2 və 313-cü maddələrdə nəzərdə tutulan ittiham elan edilməklə barələrində məhkəmənin müvafiq qərarları ilə həbs qətimkan tədbiri seçilib. Həmçinin «Aztelekom»un keçmiş rəhbəri Məhəmməd Məmmədov da həbs edilib. MTN işi ilə əlaqədar RYTN-də həyata keçirilən bu həbslərdən sonra nazir Əli Abbasov tutduğu vəzifədən kənarlaşdırıldı. Onun yerinə isə Ramin Quluzadə təyin olundu. Maraqlıdır ki, nazirlikdə baş verən qalmaqallı işlərin müqabilində nazir müavini İltimas Məmmədov heç nə olmayıbmış kimi kənarda qaldı. Halbuki, çoxları bilir ki, bu şəxs vəzifəsindən azad edilmiş Əli Abbasovun ən yaxın adamlarından biri olub. Məhz bu səbəbdən İltimas Məmmədov nazirliyin «boz kardinalı» kimi tanınıb. Çoxları onun görəvindən alınacağını gözləsə də, İltimas Məmmədov hansısa qüvvələrin yardımı sayəsində postunda qalmağı bacardı. Və təsadüfi deyil ki, nazir müavini işi bir az çətinə düşən kimi yüksək rütbəli şəxslərin adından istifadə edir və həmin şəxslər tərəfindən müdafiə olunduğunu səsləndirir. Aparlan araşdırmalar nəticəsində məlum olur ki, nazirlikdə baş vermiş nöqsanlı işlərdə sabiq nazir Əli Abbasovla yanaşı. İltimas Məmmədovun da günahı olub. Məlumata əsasən, son iki ildə nazirliyin bütün işlərinə, milyonluq layihələrə məhz nazir müavini nəzarət edib. Etibarlı mənbənin bildirdiyinə görə, İltimas Məmmədov təkcə Birinci Avropa Oyunları keçirilən vaxtlarda 5 milyondan çox xeyir götürüb: «Avropa Oyunlarının keçirilməsində lazım olan bütün bahalı rabitə avadanlıqlarının alınması nazir müavininin rəhbərliyi altında həyata keçirilib. O bu işdən öz xeyrini artıqlaması ilə götürüb. Bu adam hazırda həbsdə olan Vidadi Zeynalovla daim intriqada idi. Yola getmirdilər. Səbəbi isə o idi ki, nazir müavini «Aztelekom»un keçmiş rəhbəri Məhəmməd Məmmədovu özünə ağsaqqal seçmişdi. Hər yerdə deyirdi ki, Məhəmməd müəllim mənim ağsaqqalımdır. Amma Məhəmməd Məmmədov həbs olunandan sonra başqa nüfuzlu şəxsin adından istifadə etməyə başlayıb. Həmin şəxsin çətiri altına sığınıb postunu qorumağı bacardı. Bütün bunlara baxmayaraq, komissiya təşkil olunsa, İltimas Məmmədovun fəaliyyəti araşdırılsa, o da nazirliyin həbs olunan yüksək rütbəliləri kimi cinayət məsuliyyətinə cəlb oluna bilər». Nazir müavini ilə bağlı əlimizdə başqa faktlar da var.( Gündəlik bakı)
