4 milyona yaxın Venesuela
qaçqını dünyaya səpələnir
BMT dünyanı onlara sığınacaq verməyə səslədi; Maduro isə "Visa”, "Mastercard” sistemlərindən imtina edir...
BMT-nin Qaçqınlar Agentliyi dünya ölkələrini Venesueladan qaçanları qəbul etməyə çağıraraq, onların əksəriyyətinin beynəlxalq qaçqın yardımına ehtiyacı olduğunu bildirib.
"Yeni Müsavat” xəbər verir ki, Cenevrədə keçirilən brifinqdə sözçü Liz Trossel Venesuelada siyasi, insan haqları durumunun və humanitar vəziyyətin ağırlaşdığını deyib.
Onun bildirdiyinə görə, indiyədək ölkəni 3.7 milyon insan tərk edib. Onların 460 mini əsasən qonşu ölkələr olmaqla, siyasi sığınacaq üçün müraciətlər edib.
Agentlik şəxslərin müəyyən edilməsi prosesinin ağırlığına görə ölkələrdən sığınacaq istəyən venesuelalıların qrup şəklində təsbit edilməsini istəyir.
Bildirilir ki, venesuelalılar qanuni statuslarından asılı olmayaraq geri qaytarılmamalıdır.
Dünyanın qaçqın probleminin daha da dərinləşdiyini nəzərə alsaq, indi venesuelalıların axını vəziyyəti bir qədər də çətinləşdirəcək.
Əsasən Avropa ölkələri, xüsusən Almaniya qaçqın qəbul edir. Şimali Afrika, ərəb ölkələri, xüsusilə Suriya, İraq, Əfqanıstan, Somali qaçqınları Avropanı bürüyüb. Belə vaxtda Venesueladan da qaçqın qəbul etmək ciddi böhrana səbəb ola bilər.
Bu arada rusiyalı siyasi ekspert Vladimir Fitin deyib ki, Türkiyə Venesueladakı böhranın əvvəlindən prezident Nikolas Maduroya dəstək verib.
O, Türkiyə XİN rəhbəri Mövlud Çavuşoğlunun Venesuelaya hər cür müdaxiləyə qarşı olduqları barədə açıqlamasını şərh edib.
Fitin vurğulayıb ki, Türkiyə prezidenti Rəcəb Tayyib Ərdoğan Maduroya "Dik dur, qardaşım” deyib:"Türkiyə ABŞ-ın bir çox məsələdə təzyiqinə baxmayaraq, Venesuela ilə bağlı mövqeyindən dönmədi. Türkiyə iqtisadiyyatı daxil, bütün məsələlərdə öz siyasətini tətbiq edir”.
Venesuelaya gəlincə, ölkənin Mərkəzi Bankı və Venesuela Bank Sektorunun İdarəsi İnstitutu özünün ödəniş sistemini inkişaf etdirməyi planlaşdırır.
Məlumata görə, 2020-ci il yanvarın sonuna qədər rəsmi Karakas "Visa”, "Mastercard” və "Maestro” ödəniş sistemləri ilə əməkdaşlığını tam dayandırmaq niyyətindədir. Karakasın yeni ödəniş sistemini məhz ABŞ sanksiyalarından yayınmaq üçün yaradacağı bildirilib.
Emil SALAMOĞLU, musavat.com