Şimali Koreyanın İtaliyadakı səfiri rəsmi Romadan sığınacaq istəyib

Musavat.com xarici agentliklərə istinadən xəbər verir ki, bu barədə Cənubi Koreyanın "Chosun İlbo” qəzeti məlumat yayıb.

Qəzet diplomatın 2018-ci ilin dekabrında İtaliya hakimyyətinin himayəsi altında olduğunu bildirib.

Lakin rəsmi Roma hələ ki bu informasiyanı təsdiq etməyə tələsmir. İtaliyanın ANSA agenltiyi Xarici İşlər Nazirliyinin məsələ ilə bağlı rəsmi məlumata malik olmadığnı bildirib.

Cənubi Koreya kəşfiyyatı isə Ço Son Gilin hələ keçən ilin noyabrından xanımı ilə birlikdə yoxa çıxdığını təsiqləyib.

Ço Son Gil 2017-ci ildən, İtaliyanın rəsmi Pxenyanın nüvə sınaqlarına etiraz əlaməti olaraq Şimali Koreya səfiri Mun Çon Namı qovmasından sonra onun səlahiyyətlərini icra edirdi.

Cənubi Koreya isə hələ ki qaçqın diplomat barədə mövqeyini açıqlamayıb. Adətən Şimali Koreyadan qaçanlar Seula sığındığı üçün səfir Ço Son Gilin də buraya gəlməsi gözlənilir. Məsələn, 2017-ci ildə KXDR-in Böyük Britaniyadakı səfirliyinin müşaviri Txe Yon Xo da xanımı və uşaqları ilıə birlikdə yarımadanın cənub hissəsinə sığınmışdı.

Lakin indi vəziyyət bir qədər fərqlidir. Belə ki, hər iki dövlət arasında hazırda istiləşmə müşahidə olunur. Buna görə də rəsmi Seulun yaranan probelmlə əlaqədar hansı davranış sərgiləyəcəyi indidən maraq doğurur.