Abşeronun icra başçısı Zakir Fərəcov Sumqayıta başçı təyin olunanda camaat sevinmişdi ki, Sumqayıtda yaşayan icra başçısı əvvəlkindən daha yaxşı olacaq. Amma bu sevinc çox çəkmədi. Başçının 100 günü tamam olmamış şikayət şikayətin ardınca gəldi ki, başçı sökür, başçı dağıdır və s.
İndi də abadlaşdırma adı ilə sakinlərin illərlə əkib-becərdiyi yaşıllıqları dağıdılır. Təbii ki, hamısı yox. Yenilik.az-a daxil olan məlumata görə, Sumqayıt şəhərindəkiu 11-ci mikrorayona 1 həftə əvvəl xəbər yayılıb ki, qeyri-qanuni çəpərlər söküləcək. Camaat da düşünüb ki, abadlaşdırma olacaqsa, nümunəvi məhəllə yaradılacaqsa, niyə də olmasın?
Amma məlum olub ki, həmişə olduğu kimi yenə də kim "hörmət” edəcəksə "çəpər əməliyyatı”ndan kənarda qalacaq. Və belə də olub. Bu gün yayılan informasiyada deyilir ki, səhər tezdən İcra Hakimiyyətinin nümayəndəsi Elxan Mansurzadə və MİS-in rəisi Sumqayıt şəhəri, 11-ci mkirorayon, 26 saylı binanın arxasındakı hasarları sökdürməyə başlayıb. Sakinlərin "niyə hamısı sökülmür" sualına cavab olaraq isə bildirilib ki, bu ərazi plana düşüb.
İndi sakinlər həm də ona görə narahatdır ki, adıçəkilən ərazinin hansısa MTK-ya göydələn tikintisi üçün satıldığını eşidiblər. Bu xəbər doğru çıxsa, ətrafdakı binalar qəza vəziyyətinə düşə bilər.
ULUYOL.İNFO
