Ərbəin mərasimi qeyd olundu

Oktyabrın 30-da İmam Hüseynin şəhadətinin 40-cı günü – Ərbəin qeyd olunub. Ənənəvi olaraq Ərbəin İraqın Kərbəla şəhərində izdihamlı şəkildə qeyd olunur. Hər il olduğu kimi, bu il də insanlar Ərəbəin münasibəti ilə İmam Əlinin (ə) məzarının yerləşdiyi Nəcəf şəhərindən İmam Hüseyn (ə) və silahdaşlarının dəfn olunduğu Kərbəla şəhərinə yürüş ediblər.

Bu il Ərbəin yürüşünə 15 milyon insan qatılıb. "Salam Nyus” Agentliyi İraqın əl-Məlumə xəbər portalına istinadla xəbər verir ki, bu barədə Kərbəla Əyalətinin Qubernatorluq Şurasının baş katibi Məhfuz ət-Təmimi məlumat verib.

Ərbəin yürüşünə qatılanların 4 milyonu xarici zəvvardır. Sumariya Agentliyi bildirib ki, bu Ərbəin mərasimi zamanı 10 mindən artıq səyyar və sabit xidmət mərkəzi Nəcəf-Kərbəla yolunda zəvvarlara xidmət göstəriblər. Bundan başqa İraq ordusu, "Həşdi-Şabi”, polis, milli təhlükəsizlik və hava qüvvələri də daxil olmaqla yüz mindən artıq təhlükəsizlik qüvvəsi bu Ərbəin mərasimini təhlükəsizliyini qoruyurlar. Yalnız 1500 nəqliyyat vasitəsi və 7 min könüllü təmizlik işlərinə cəlb edilib.

Qeyd edək ki, Ərbəin Aşura hadisəsi, yəni İmam Hüseyn (ə) və silahdaşlarının faciəli şəkildə qətlə yetirilməsinin 40-cı günüdür. Ərbəin sözü ərəbcə qırx mənasını daşıyır. İslam rəvayətlərinə əsasən ilk Ərbəin mərasimi İmam Hüseynin (ə) şəhid olduğu il, yəni hicri 61-ci (miladi 680-ci) ildə qeyd olunub. Mədinədə yaşayan və Kərbəla şəhidlərinin məzarını ziyarət edərək Ərbəin ritualıının əsasını qoymuş ilk şəxs isə peyğəmbərin silahdaşlarından olan Cabir ibn Abdullah Ənsari sayılır. Məlumatlarda eyni zamanda həmin vaxt ətraf qəbilələrin də bu matəmə qoşulduğu qeyd edilir. Beləliklə, hər il müsəlmanların Ərbəin günü Kərbəlaya gedib Cabir ibn Abdullahın etdiyi hərəkətləri təkrarlaması İmam Hüseynə ehtiram sayılır.

Sonrakı ötən dövrdə hər il Ərbəin günlərində insanların Nəcəffdən Kərbəlaya 85 kilometrlik məsafəni piyada yeriyərək yürüş etməsi bir ənənəyə çevrilib. Xüsusən də 4 il əvvəl 2014-cü ildən sonra Ərbəin yürüşü kütləvi hal alıb. 2014-cü ildə İraqın bir çox şəhəri İŞİD tərəfindən işğal olunmuşdu. Ancaq din alimlərinin çağırışından sonra minlərlə insan Ərbəin yürüşünə qatıldı. Həmin dövrdə iştirakçıların sayı barədə fərqli fikirlər olub, hətta 20 milyon zəvvarın olduğu deyilsə də, Kərbəla valiliyi 13 milyon nəfərin Ərbəin günlərində Kərbəlaya daxil olduğu barədə rəsmi məlumat yayıb. Azərbaycandan da hər il minlərlə insan Ərəbin yürüşünə qatılır. 2017-ci ildə Ərbəinə Azərbaycandan 30 min nəfərin qatılması ilə bağlı məlumat verilib. Ancaq hətta ən minimal rəqəmlər belə Ərbəinin dünyada ən kütləvi dini mərasim olduğunu təsdiqləyir.

Xatırladırıq ki, Kərbəla şəhidlərinin matəm mərasimi ərbəin günündə başa çatsa da, bundan sonra daha 9 və ya 10 gün şadlıq etməmək, hüznlü olmaq savab sayılır. Çünki səfər ayının 28-də Həzrət Mühəmməd Peyğəmbərin (s) və İmam Həsənin (ə) vəfat günü, səfər ayının son günündə (29-u və ya 30-da) isə İmam Rzanın (ə) şəhadət günü qeyd edilir. Bu müqəddəslərin ruhuna ehtiram əlaməti olaraq, səfər ayının sonuna kimi matəmi uzatmaq məsləhətdir.

Kənan Rövşənoğlu,
Musavat.com