İsrail fələstinli qıza görə
bu dəfə Madrid "Real"ına ilişdi
İspaniyanın "Real" (Madrid) futbol klubunun fələstinlilərin İsraillə mübarizəsində simvol isimlərdən biri sayılan Ahid Tamimini dəvət etməsi rəsmi Tel-Əvivin xoşuna gəlməyib.
Musavat.com xarici mediaya istinadən xəbər verir ki, Ahid Tamimi İspaniyaya səfəri zamanı klub tərəfindən "Santyaqo Barnabeu" stadionuna çağırılıb və üstəlik, orada ona klubun forması hədiyyə edilib. Tamiminin fotoları sosial şəbəkələrdə dəfələrlə paylaşılıb.
"Euronews” un xəbərinə əsasən İsrail rəsmilərinin reaksiyası özünü çox gözlətməyib. İsrail Xarici İşlər Nazirliyinin sözcüsü Emmanuel Naşon "Adlı-sanlı "Real" futbol klubu nifrət və şiddətə çağıran bir terroristə qucaq açır. Hadisə olduqca utancvericidir”,- açıqlamasını verib.
İsrailin İspaniyadakı səfiri Daniel Kutner isə Ahid Tamiminin sülh üçün mücadilə aparmadığını, terror və iğtişaşları müdafiə etdiyini bildirib. "Onu qəbul edən və dəstəkləyən qurumlar da ehtiyacımız olan dialoq və qarşılqlı anlayışı deyil, şiddətin tərəfdarı kimi çıxış edilər”, -səfir deyib.
Ahid Tamimi 2017-ci ilin dekabrında evlərinə zorla girən İsrail əsgərlərinə verdyi təpki və bir əsgərə şillə atdığı videoları ilə gündəmə gəlib. İsrail məhkəməsi onu 8 ay həbs cəzasına məhkum etdikdən sonra sərbəst buraxıb.
