Modriç ilin ən yaxşı futbolçusu seçildi
Avqustun 30-da UEFA Çempionlar Liqasının püşkatma mərasimindən sonra ilin ən yaxşı futbolçusunun adı açıqlanıb.
Uluyol.az Azərtac-a istinadla xəbər verir ki, UEFA bu nominasiya üzrə qalib olaraq Xorvatiya milli komandasının və İspaniyanın "Real Madrid” klubunun yarımmüdafiəçisi Luka Modriçi seçib.
Ən yaxşı qapıçı adına İspaniyanın "Real Madrid” klubunda çıxış edən Keylor Navas layiq görülüb.
Onun komanda yoldaşı Serxio Ramos ən yaxşı müdafiəçi adına sahib olub. Ötən mövsüm "Real Madrid”in formasını geyinən, yeni mövsümdən isə "Yuventus”a keçid edən Kriştiano Ronaldo ən yaxşı hücumçu nominasiyasında qalib elan edilib.
Qadın futbolçular arasında ən yaxşı oyunçu nominasiyasının qalibi isə Danimarka millisinin və Almaniyanın "Volfsburq” komandasının üzvü Pernille Harder seçilib.