Vətəndaşın sözlərinə görə, B.İbadullayev onlara "satacağı” evin sənədləşdirilməsini də vəd edib və bu işin 7 min manata başa gələcəyini deyib: "Əli adında bir nəfərin vasitəsi ilə həmin ikimərtəbəli evə kupça alacaqdı. Bəybala dedi ki, bu iş mənlikdir, sonra hardansa 7 min manat tapıb Əliyə verdi, amma sonra bu məsələnin baş tutmadığını öyrəndik. Çünki həmin ev qaz xəttinin üzərində tikilib və orda ev tikilməsi də qanunsuzdur. Lakin bu məsələ məlum olduqda artıq atam mənzilimizi Bəybalanın dediyi adamın adına keçirmişdi.

Sonradan bizə məlum oldu ki, Bəybala İbadullayev həmin 7 min manatı da bizim evimizi satdığı şəxsdən alıb”. Şikayətçi bildirib ki, həmin müddətdə Bəybala onları aldadıb və vaxtı uzadaraq, nə sənədlə, nə də evlə təmin edib: "Biz 2 ay sonra evdən çıxmalı olduq və 4 ilə yaxın müddətdə kirayədə qaldıq. Bəybalanın dediyi evə getdikdə isə gördük ki, o evi də kiməsə borcu qarşılığında verib və artıq həmin evdə məskunlaşanlar var. Bəybala İbadullayev bu 4 ildə bizə cəmi 26 min dollar pul verib, 27 min dolları isə ondan hələ ala bilməmişik. Bu müddətdə həm evlər xeyli bahalaşıb, həm də biz aylarla, illərlə kirayə pulu vermişik”.

Babək Mustafayev bizim müxbirimizlə söhbət zamanı qeyd edib ki, 3 il əvvəl Bəybala müəllim başqa vətəndaşların şikayətləri əsasında saxlanılmışdı və onu həbs gözləyirdi: "Lakin cəmiyyətin sədri Səmyar Abdullayev qapı-qapı düşüb vətəndaşları inandırdı ki, şikayətinizi geri çəkin, pulu verəcəyik. O vaxt atamla da görüşüb deyib ki, narahat olmayın, Bəybala pulunuzu verəcək. Bəybalanın yanında köməkçi kimi gəzən Hikmət adlı şəxs vardı. Hikmət bir dəfə içkili olan zaman demişdi ki, "ortada 4 milyon manatlıq yeyinti var, Bəybala və Səmyar dövlətin 4 milyonluq vəsaitini talan ediblər; Bəybala içəri getsə, onları da aparacaq, ona görə də Səmyar narahat olub”. Onlar Şıxov tərəfdə də başqalarına qanunsuz ev satmışdılar. Çoxunu belə aldadıblar. Sizdən isə xahişim odur ki, bu fırıldaqçıların əməllərinin işıqlandırılmasında və bizim problemimizin həllində dəstək verəsiniz”. Biz qarşı tərəfin də mövqeyini öyrənmək məqsədi ilə Bəybala İbadullayevlə əlaqə saxladıq.

Bəybala müəllim bizə öz soyadını Həsənov desə də, bizim onun əsl soyadından məlumatlı olduğumuzu öyrəndikdə söhbəti zarafata çevirdi: "Mən familiyamı dəyişmişəm, İbadullayev Nikolayın vaxtındakı familiyamdır”. Məsələ ilə bağlı müsahibimizə informasiya verdik, jurnalist etikası və qanunvericiliyə uyğun olaraq, onun da mövqeyini işıqlandırmaq istədiyimizi bildirdik. B.İbadullayev hazırda Gözdən Əlillər Cəmiyyətində işləmədiyini, "Braille Teknik Azərbaycan” MMC-nin rəhbəri olduğunu qeyd etdi. "Babək və Əlləz Mustafayevləri tanıyırsınız?” – deyə soruşduq. "Bəli, tanıyıram… Əlləz müəllim gözəl insandır”. "Amma sizin gözəl insan dediyiniz adamlar sizi fırıldaqda ittiham edir. Dediklərinə görə, siz onları aldatmısınız və neçə ildir 27 min dollar borcu ödəmirsiniz”, – deyə qeyd etdik. "Məsələ tam o cür deyil. Mənim o adamlarla heç bir alqı-satqı işim olmayıb. Həmin söhbətdən xəbərim var, onların problemi tezliklə həllini tapacaq”, – deyə B.İbadullayev bildirdi.

"Yəni, sizin onlara borcunuz yoxdur”, – deyə soruşduq. "Mənim yoxdur, amma o məsələdə mənim də qismən rolum var. Onların problemi ən qısa müddətdə, bir aya həll olunacaq. Ən yüksək səviyyədə həlli tapacaq. Mən qaytarmayacam, amma o pulun onlara çatmasına kömək edəcəyəm”, – deyə B.İbadullayev vurğulayıb. "Cəmiyyətin adından istifadə edərək torpaqlar zəbt edib evlər tikdiyinizi, sonra da müxtəlif vətəndaşlara satdığınız deyilir. Sizin bir vaxtlar məhz belə işlərə görə tutulduğunuzu da eşitdik.

Sizin 4 milyon manatlıq yeyintidə iştirak etdiyiniz barədə də iddialar var… Nə məsələ idi?”, – deyə soruşduq. "Yeyinti eləmişəmsə də, məhkəmə qarşısında cavab vermişəm. O vaxt tutulmuşam, nə etmişəmsə cəzamı çəkmişəm. Bunun məsələyə dəxli yoxdur. Bunu yenidən gündəmə gətirməyin nə mənası var?”, – deyə B.İbadullayev cavab verdi. "Babək Mustafayevin pulunu 4 ildə niyə qaytarmırdınız ki? Bu məsələ həqiqətən öz həllini tapacaq?” – deyə dəqiqləşdirmək istədik. "Dörd milyon yemişiksə, 27 min manatı da tapıb verərik”, – deyə müsahibimiz bildirdi. "Deməli, siz etiraf edirsiniz ki, 4 milyon manatlıq yeyinti olub?” sualına isə B.İbadullayev gülərək cavab verdi: "Ha-ha-ha… Ay da… Yaxşı olacaq (deyəsən, müsahibimiz bilmədən "səhv etdiyini” anlamışdı – red.) Yox, siz deyirsiniz də, belə iddialar var. Ona görə deyirəm”. Gözdən Əlillər Cəmiyyətinin sədri Səmyar Abdullayevin bu məsələdə rolunun nə dərəcədə olduğunu da aydınlaşdırmağa çalışırıq. Onun münasibətini də öyrənmək üçün cəhdlərimiz boşa çıxıb. Lakin mövzunu diqqətdə saxlayaraq, bütün tərəflərin əlavə fikir, irad və mövqeyini dərc edəcəyik.