Paytaxt Bakıda bəzi binaların yenidən üzlənməsinə başlanılıb. Özü də
bundan az əvvəl üzlənmiş binaların.
Musavat.com xəbər verir ki, Xətai rayonu, Nobel prospektində yerləşən yaşayış
binalarının yenidən üzlənməsinə başlanılıb. Əvvəlcə onu qeyd edək ki,
bu binaların fasadı 2015-ci ildə yenilənmişdi. Yol kənarında olan binaların hamısı
penoplastla bəzədilmişdi.
Lakin ötən il paytaxtda ardıcıl iki "penoplast faciəsi” yaşandı. Əvvəlcə
Xətai rayonunda, daha sonra isə Binəqədidəki binalarda penoplast üzlüyün
yanması nəticəsində onlarla insan həyatını itirdi, bir çoxu da yaralandı. Vətəndaşlara
maddi və mənəvi zərər dəydi.
Bu iki faciədən sonra həm Bakıda, həm də rayonlarda binalar prezidentin göstərişi
ilə penoplastdan təmizləndi. Əvəzində isə bəzi binalar rəngləndi, bəziləri isə
alışmayan maddələrlə yenidən üzləndi.
İlk "penoplast faciəsi”nin yaşandığı Xətai rayonundakı bina da yenidən üzlənəcək.
Qəzadan sonra yenidən, tamamilə təmir edilən və vətəndaşların istifadəsinə
verilən bina bu günlərdə yenidən üzlənməyə hazırlanır. Artıq həmin binanın
qonşuluğundakı binalar üzlənib və növbə həmin binaya çatıb. Bu binaların yenidən
üzlənməsi zərurətinin nədən yarandığı isə məlum deyil. Maraqlıdır ki, baş verən
faciədən sonra bütün binaların fasadı Avropa Oyunları ərəfəsində çox qısa müddət
ərzində yenilənmişdi.
Ərazidə olarkən binaların üzünə çəkilən materialla yaxından tanış olduq. İşçilər
bildirdilər ki, bu material qum, əhəng və sementdən hazırlanır və uzun ömürlüdür.
Bu isə baş verə biləcək hər hansı bir qəzada yanğına səbəb ola bilməz.
Binaların yenidən üzlənməsi zərurətinin nədən yaranmasına gəlincə isə işçilər
bildirdilər ki, bu Xətai Rayon İcra Hakimiyyətinin sifarişi ilə həyata keçirilir, onlar isə
sadəcə olaraq verilən göstərişi icra edirlər.
Həqiqətən maraqlıdır yenicə üzlənmiş binaların təkrardan üzlənməsinə nə ehtiyac
var? Ölkədə iqtisadi vəziyyətin çətin olduğu, hökumətin böhrandan çıxış yolları
axtardığı, maliyyə nazirinin belə "israfçılığa yol verməməliyik" dediyi bir zamanda
bu kimə lazımdır?
İlkin Muradov
ULUYOL.İNFO
