Müsavatda Azərbaycan ordusunun 100 illiyi qeyd edildi
Müsavat Partiyasının qərargahında Azərbaycan Silahlı Qüvvələrinin 100 illik yubileyi ilə əlaqədar tədbir keçirilib.
Azərbaycan himninin oxunması ilə başlayan tədbirdə Müsavat başqanı Arif Hacılı, istiqlalçı millət vəkili Hacıbaba Əzimov, Milli Şuranın sədri Cəmil Həsənli, Bütöv Azərbaycan Birliyinin Mərkəzi Şurasının sədri Aqil Səmədbəyli, Güney Azərbaycan İstiqlalçıları təşkilatının başqanı Əjdər Tağızadə və digərləri çıxış ediblər.
Çıxışlarda Məhəmməd Əmin Rəsulzadənin və milli hökumətin qərarı ilə yaradılan ordumuzun 1918-ci ildə Qarabağın, Bakının, Qubanın və digər ərazilərimizin erməni-rus hərbi birləşmələrindən azad edilməsində rolu qeyd edilib, vətən torpaq uğrunda şəhid olan əsgər və zabitlərimizin xatirəsi yad edilib.
Bildirilib ki, 100 il əvvəl milli ordumuz qondarma Sentrokaspi resbublikasını, Muğan bölgəsində yaradılmış "Muğan sovet respublikasının” ləğv edərək Azərbaycan Xalq Cümhuriyyətinin suverenliyini təmin edib.
Tədbirin sonunda Müsavat başqanı Arif Hacılı Cümhuriyyətin 100 illiyi ilə əlaqədar Cəmil Həsənliyə, Hacıbaba Əzimova, Əjdər Tağızadəyə, Qarabağ qazisi Əzizağa Süleymanova, Aqil Səmədbəyliyə, Arzu Səmədbəyliyə və digərlərinə fəxri fərman təqdim edib.
Fəxri fərman "Azərbaycanda Cunhuriyyət dəyərlərinin bərpası, hüquqi dövlət, azad cəmiyyət quruculuğu uğrunda apardığı ardıcıl, prinsipial mübarizəyə görə və Azərbaycan Cümhuriyyətinin 100 illiyi münasibətilə” təqdim olunub.