"Qazaxıstanla oyunda çox səhv üzə çıxdı" - Ağasəlim Mircavadov

Bu sözləri Qol.az-a açıqlamasında Azərbaycanın əməkdar məşqçisi Ağasəlim Mircavadov millimizin Qazaxıstana uduzduğu (0:3) yoxlama oyununu dəyərləndirərkən deyib.

Yığmamızdakı problemlərdən danışan 71 yaşlı mütəxəssis baş məşqçi Qurban Qurbanovun hələ axtarışda olduğunu bildirib: "Məşqçilər özləri də bilirlər ki, problemlər var. Xüsusən müdafiənin mərkəzində. Orta xətdə də çatışmazlıq görünür. Kəsərli hücumumuz yoxdur. Qolların buraxılmasında isə bütün komandanın səhvi var. Tək müdafiəçiləri qınamaq olmaz. Hücum qura bilmirik. Futbolçularımız bir-birini yaxşı başa düşmür. Bəziləri yenidir. Qurban Qurbanov hələ ki, axtarışdadır.

Hansı oyun üçün yoldaşlıq görüşü keçirirsənsə, ona uyğun heyətlə oynamalısan. Bəlkə də Qurban Qurbanov hələ istədiyi futbolçuları tapa bilməyib. Riçard Almeydanın da yoxluğu millinin oyununa böyük təsir edir. Bundan başqa, bəzi futbolçular yaxşı formada deyil. Əsas odur ki, yığmamız səhvlərini görsün və bunları aradan qaldırsın. Millimizin üzvləri "Qarabağ", "Qəbələ", "Keşlə" və "Neftçi"nin heyətində avrokuboklarda mübarizə aparacaq. Futbolçular bu oyunlarda hazır olmalıdır ki, yığmaya da fayda versin".

Millimizin sabiq çalışdırıcısı yığmadakı futbolçu qıtlığından danışıb. O, bu məsələdə klubları günahlandırıb: "Əslində dünənki oyunda millimiz tam formalaşmış heyətlə meydana çıxmalı idi. Bəlkə də, elə heyət belə olacaq. Ancaq problemlər hələ də var. Bunu aradan qaldırmaq klubların üzərinə düşür. Klub məşqçiləri daha çox işləməlidir. Baxın, Rəşad Sadıqov uzun illərdir müdafiənin mərkəzini qoruyurdu. Rəşad da insandır, əvvəl axır yığmadan getməl idi. Problem odur ki, klublarda onun yerinə futbolçu yetişdirilmir. "Qarabağ" və "Qəbələ" öndə gedən klublarımızdır. Yalnız "Qarabağ"da mərkəz müdafiəçiləri yerlidir. "Qəbələ"də yoxdur. "Neftçi" və "Keşlə"də bir nəfərdir. Oyunçu yığmaya klubdan gəlir. Bizdə hamı deyir ki, yığma komanda yetişdirməliyik. Bu, düzgün fikir deyil. Yığmanın ildə 2 dəfə toplanışı olur. Baş məşqçi ancaq taktika üzərində işləyir. Futbolçu isə klublarda yetişir".