Xanım təşkilat rəhbəri yenə müsəlmanları təhqir etdi:"İnananlar..." - FOTOFAKT

Musavat.com xəbər verir ki, söhbət "Uşaq və Tələbə Gənclər Dünyası” İctimai Birliyinin sədri Bəxtimşah Tağıyevadan gedir.

QHT sədri ötən ilin iyun ayında qalmaqallı status yazaraq Azan səsinə qarşı olduğunu bəyan etmişdi. Onun bu fikirləri sosial şəbəkələrdə və mətbuatda müzakirə mövzusu olan zaman QHT sədri həmin statusunu silmişdi.

Açıqlamasında isə əvvəlcə bildirmişdi ki, onu bu fikirlərinə görə tənqid edənlər savadsız cahillərdir. Təşkilat rəhbəri ona irad bildirənləri Azərbaycanda olan geylərə, ermənilərə, qısa şalvarlılara, qara çarşablılara, vəhhabilərə də etiraz etməyə çağırmışdı.

Amma təşkilat rəhbəri bu açıqlaması ilə də özünü müdafiə etməyi bacarmadığını görüb növbəti fikrində bildirdi ki, Azan səsi ilə bağlı yazılanları onun adından başqası yazıb. B.Tağıyevə deyirdi ki, kompüteri açıq qalıb və kimsə onun adından belə bir status yazıb.

Təşkilat rəhbəri bu addımı özünə qarşı təxribat adlandıraraq şübhələndiyi şəxsin olduğunu da söyləmişdi. Artıq həmin adamın şəxsiyyətini müəyyənləşdirdiyini də deyən B.Tağıyeva qısa zamanda onun kimliyini açıqlayacağını da bildirmişdi.

Amma bir ilə yaxın vaxt keçsə də təşkilat rəhbəri "ona qarşı təxribatı" sübut edə, həmin şəxsin adını açıqlaya bilmədi. Bunun əvəzində isə növbəti dəfə inanclı kəsimi təhqir etməyi bacardı.

O, sosial şəbəkədə Müqəddəs Ramaza ayı və Oruc tutulması ilə bağlı müzakirələrdə aqressiv mövqe sərgiləyərək İslama inanları şərəfsiz adlandırıb. Bu isə inanclı kəsimin narazılığına səbəb olub.

Təşkilat rəhbəri ona iradını bildirənləri blok edərək öz hesabını bir müddət bağlayıb.

İ.Muradov, musavat.com