Rauf Talışinski sabah dəfn
ediləcək - vidalaşma mərasimi Təzəpir məscidində olacaq
Xəbər verildiyi kimi, bu gün "Exo” qəzetinin baş redaktoru Rauf Talışinski qəflətən vəfat edib. Onun infarktdan vəfat etdiyi bildirilir.
Mərhumun yaxınlarının Musavat. com-a verdiyi məlumata görə, mərhum sabah saat 14-də Təzəpir məscidindən götürülərək dəfn məkanına aparılacaq. R.Talışinski ilə vidalaşma və hüzr məclisi də sözügedən məsciddə olacaq.
Qeyd edək ki, Rauf Talışinski 1956-cı ildə Azərbaycanın tanınmış ziyalı və zadəgən ailələrindən birində anadan olub. 1978-ci ildə Lomonosova adına Moskva Dövlət Universitetinin jurnalistika fakültəsini bitirib.
"Molodyoj Azerbaydjana", "Vışka" və "İzvestiya" kimi qəzetlərdə çalışıb. 1990-cı ildən "Ayna"/ "Zerkalo" qəzetinin rəhbərlərindən biri olaraq müasir Azərbaycan jurnalistikasının formalaşmasında böyük rol oynayıb.
Rauf Talışinski 27 Yanvar 2001-ci ildən "Exo" qəzetinin baş redaktoru olub. Rauf Talışinski jurnalistikanın inkişafındakı xidmətlərinə görə "Əməkdar jurnalist" fəxri adına layiq görülüb.
Allah rəhmət eləsin.
