Venesuela həbsxanasında
dəhşətli yanğın - 78 nəfər öldü
Hadisə zamanı ölənlərdən 68-i kişi, 10-u qadındır
Venesuelanın Karabobo ştatında həbsxanada güclü yanğın baş verib.
Real TV "RİA Novosti” agentliyinə istinadla xəbər verir ki, baş verən hadisə zamanı 78 nəfər ölüb. Bu barədə Venesuelanın baş prokuroru Tarek Uilyam Saab məlumat verib.
Onun sözlərinə görə, hazırda baş vermiş hadisə araşdırılır.
"Baş verən hadisə ilə əlaqədar 4 prokuror açılmış cinayət işini araşdırır. Məsələ diqqətdədir və səbəbkarlar mütləq cəzalandırılacaq”, - deyə baş prokuror "Twitter” hesabında yazıb.
Qeyd edək ki, yanğın hadisəsi həbsxanada qiyam baş verdikdən sonra meydana gəlib. Hadisə zamanı ölənlərdən 68-i kişi, 10-u qadın olduğu bildirilir. Məlumata görə, qadınlar məhkumluq həyatı yaşayan ərlərinə baş çəkdikləri zaman həyatlarını itiriblər.
Xatırladaq ki, 2013-cü ildə Venesuelanın Lara ştatında həbsxanada baş vermiş qiyam 61 nəfərin ölümünə səbəb olub, yaralıların sayı 120 nəfər çatıb.
