Fevralın 2-də Müsavat Partiyasının Sədrlər Şurasının növbəti iclası keçirilib. Partiyanın mətbuat xidmətindən "Basta”ya verilən məlumata görə,  Mərkəzi İcra Aparatının sədri Gülaga Aslanlının sədrliyi ilə keçirilən iclasda qərarların icra vəziyyəti müzakirə olunub və rayon təşkilatları sədrlərinə yeni tapşırıqlar verilib.

İclasda çıxış edən Gülaga Aslanlı ölkədə yaranmış durumla əlaqədar bu il parlament, yaxud prezident seçkilərinin keçirilməsinin istisna olmadığını deyib. Gülağa Aslanlı Müsavatın yerli strukturlarının seçkilərə hazır vəziyyətə gətirilməsini tövsiyyə edib.

İclasda həmçinin Məhəmməd Əmin Rəsulzadənin anadan olmasının 132-ci ildönümü ilə bağlı Novxanıda keçirilən son mitinqində müsavatçıların fəal iştirakı təqdir olunub, həmin tədbirdə aparılan monitorinqin nəticələri dinlənilib.

MSDM-in təşəbbüsü ilə fevralın 6-da saat 15:00-da partiyanın qərargahında keçiriləcək Dəyirmi Masada müsavatçıların fəal iştirakı tövsiyyə olunub. İclasda yeni üzvlərin qəbulu, üzvlük haqlarının toplanması və digər təşkilati məsələrlə bağlı məlumatlar dinlənilib.

bastainfo.com