Azər Paşayev: «Tələbimiz Təhsil Nazirliyindəki özbaşınalığa son qoyulması və Elnur Əliyevin təhsil sistemindən uzaqlaşdırılması olacaq»
Xəbər verdiyimiz kimi, «Ömər Xəyyam Dərsanələri» Təhsil Mərkəzi ilə Təhsil Nazirliyi arasındakı münaqişəli vəziyyət pik həddə çatıb. JAM.AZ xəbər verir ki, mərkəzin rəhbəri Azər Paşayevlə nazirlik arasındakı danışıqlar isə baş tutmayıb.
Qeyd edək ki, Təhsil Nazirliyi «Birgə fəaliyyət haqqında» müqaviləyə əsasən «Ömər Xəyyam Dərsanələri» birnövbəli orta məktəblərdə kurslar təşkil edib. 2014-cü ildən başlayan proses bir il sonra nazirlik tərəfindən dayandırılıb. Səbəb kimi isə heç bir tutarlı əsas göstərilməyib. Lakin sonradan məlum olub ki, Təhsil Naziliyin mərkəzə olan mənfi münasibətinin formalaşmasına səbəb MTN olub. Daha doğrusu, həmin vaxt MTN əməkdaşları «Ömər Xəyyam Dərsanələri»nin sahibi Azər Paşayevdən rüşvət istəyiblər, o da bundan imtina edib. Bu olaydan sonra Təhsil Nazirliyinə MTN tərəfindən təlimat verilir ki, tədris mərkəzinə problem yaratsın və onun fəaliyyətini dayandırmağa nail olsun.
JAM.AZ-a açıqlama verən «Ömər Xəyyam Dərsanələri» Tədris Mərkəzinin rəhbəri Azər Paşayev bildirib ki, Təhsil Nazirliyi ilə apardığı uzunmüddətli danışıqlar nəticəsiz qalıb. Bu səbəbdən də təmsil etdiyi qurumun işini dayandırması üçün fevralın 4-ü son gün olaraq müəyyən edilib. «Təhsil Nazirliyində bu işlərin başında duranlar Elnur Əliyevlə Ceyhun Bayramovdur. Bu açıq şəkildə sahibkarlığın qarşısını almaqdır. Dövlət başçısı dəfələrlə bəyan edib ki, yeni iş yerləri yaratmaqla yanaşı, mövcud iş yerlərində də ixtisarlara yol verilməsin. Biz də dövlət başçısının bu təklifinə əsasən işçilərimizi ixtisar etməkdən imtina etmişik. Amma Təhsil Nazirliyi faktiki olaraq Prezidentin idarəsinə qarşı çıxmaqla yanaşı, ondan artıq ailənin dolanışığını da sıradan çıxarır».
Azər Paşayev bildirir ki, məsələni bu şəkildə qoymaq fikrində deyillər. «Fevralın 4-ü saat 12:00-da Prezident Admnistrasiyasının qarşşısında etiraz aksiyası keçirmək fikrindəyik. Dinc aksiyada mənimlə bərabər, mərkəzimizin müəllimləri və narazı validyenlər də iştirak edəcəklər. Tələbimiz isə Təhsil Nazirliyində baş verən özbaşınalığa son qoyulması və Elnur Əliyev kimi bacarıqsız kadrın təhsil sistemindən uzaqlaşdırılmasından ibarət olacaq».
