Müsavat Partiyası Qubadlı rayon təşkilatının və partiyanın gənclər təkilatının üzvü, "Hədəf” hazırlıq kursunun müəllimi, ali təhsilli filoloq Elvin Paşayevin həbs olunması ilə bağlı bəyanat verib. Müsavatdan "Basta”ya göndərilən bəyanatda deyilir:

Elvin Paşayevin itkin düşməsi haqqında onun ailə üzvləri tərəfindən Sumqayıt şəhər Polis İdarəsinə və Daxili İşlər Nazirliyinin "102” xidmətinə müraciətlər olunmasına baxmayaraq, bir neçə gün ərzində onun saxlanılması barədə heç bir məlumat verilməyib.

Yanvarın 26-da isə Elvin Paşayevin yanvarın 23-də Sumqayıtda saxlanıldığı və cibindən 65 qram tiryək çıxması iddiası ilə barəsində 4 ay həbs qətimkan tədbiri seçildiyi məlum olub.

Müsavat Partiyası gənc müsavatçı Elvin Paşayevin həbsinin siyasi məqsəd daşıdığı, bu həbsin onun sosial şəbəkələrdə ölkədə baş verən rüşvətxorluq faktlarını açıqlamasına görə həyata keçirildiyi qənaətindədir. Müxalifətçi gənclərin etirazlarının qarşısının alınması, onların narkotika iddiası ilə həbs edilməsi artıq ənənə halını alır. Bu fakt həm də ölkədə yaranan etiraz dalğasının qarşısının alınması cəmiyyətdə xof mühitinin yaradılması istiqamətində hakimiyyətin atdığı addımlardan biridir.

Müsavat Partiyası bu hadisəni qətiyyətlə pisləyir və Elvin Paşayevin və digər siyasi məhbusların dərhal azad edilməsini tələb edir.

27 yanvar 2016-cı il