Arif Hacılı: "Xalqın çocuqları Qəbələ dağlarında itkin düşüb. Hardasan FHN?”
Dekabrın 23-də Quba rayonunun Xınalıq kəndindən Tufandağı istiqamətində hərəkət edən "Gilavar” Havavə Ekstrim İdman klubunun itkin düşmüş 3 üzvünün, Babur Hüseynov, Namin Bünyatov və Fəridə Cəbrayılzadədən hələ də, xəbər yoxdu.
Müsavat başqanı Arif Hacılı bu məsələyə münasibət bildirib.
"Əvvəl yanğınsöndürmə idarəsi vardı. Yanğın olanda söndürürdülər və ya buna cəhd edirdilər, olmayanda domino oynayırdılar. Heç kəslə işləri yox idi.
Sonra Rusiyada Fövqəladə Hallar Nazirliyi yarandı, yanğınsöndürənlər də bu nazirliyə daxil edildi. Putin ən yaxın dostu Şoyqunu bu nazirliyə rəhbər təyin etdi.
Fəttah Heydərov da düşündü ki, ölkənin ikinci vəzifəsi budur və Kəmaləddin Heydərovun Fövqəladə Hallar Naziri təyin edilməsinə nail oldu. O vaxtdan yanğınsöndürənlər idarəsi də DİN, MTN, Vergilər Nazirliyi və s. kimi "mühüm”, hər kəsdən haqq tələb etmək hüququna malik bir nazirliyə çevrildi.
Bu nazirliyə dövlət büdcəsindən 100 milyonlarla vəsait
ayrıldı.
Amma nəsə müsbət bir dəyişiklik baş vermədi. Yalnız sadə yanğınsöndürənlər, təkəbbürlü FHN işçilərinə çevrildilər.
Heç Kəmaləddin Heydərov da Azərbaycanın Şoyqusu olmadı.
Talenin ironiyasına baxın. Üç alpinistimiz fövqəlnazirin
sevimli yurdu Qəbələ dağlarında itkin düşüb. Nə normal bir axtarış var, nə
axtarışın gedişi barədə ətraflı bir məlumat var. Sanki FHN üçün 100 milonluq
avadanlıqlar, helikopterlər bunların istirahəti, əylənməsi, ov etməsi üçün
alınıb, sanki, dövlət büdcəsindən bu nazirlik üçün ayrılmış vəsaitlər nazirin
qohumlarının, yerlilərinin maddi rifahının təmin edilməsi üçündür.
Xalqın çocuqları Qəbələ dağlarında itkin düşüb.
Hardasan FHN ?”
Yazı Arif Hacılının "Facebook” səhifəsindən götürülüb.
(Bastainfo.com)
