Son günlər müəllim - şagird münasibətləri ilə bağlı xoşagəlməz informasiyalar gündəmi zəbt etdi. Əvvəlcə Sumqayıtda baş verən olay, sonra isə Xətai rayonunda valideynin müəllim ilə savaşması cəmiyyətdə müzakirə obyektinə çevrildi.

Təhsil üzrə ekspert Kamran Əsədov bu barədə qənaətini yazaraq Moderator.az - a göndərib:

"Son günlərdə ayrı-ayrı mətbuat orqanlarında və internet şəbəkəsində Sumqayıt şəhəri 22 saylı orta məktəbdə müəllimin şagirdi vəhşicəsinə döyməsi ilə bağlı video-süjet təqdim olunmaqda, şagirdlərin hüquqları ilə bağlı müzakirələr açılmaqdadır. Məsələnin birtərəfli təqdimatı əlbəttə ki, problemin həllinə yox, ayrı-ayrı yazarların düşüncəsinə xidmət edir. Mənim fikrimcə, müəllim-şagird qovğasında birbaşa cəmiyyətin özü, onun fərdləri, valideynlər, şagirdin tərbiyə aldığı mühit günahkardır. Çünki cəmiyyət təlim-tərbiyə prosesinə sırf təlim prosesi kimi baxır. Yanlış olan da elə bu düşüncədir. Müəllimi ittiham etməzdən qabaq valideynlər, cəmiyyətin hər bir üzvü əvvəlcə özünün təlim-tərbiyə metodlarına, övladına davranış, əxlaq, danışıq barədə verdiyi öyüd-nəsihətlərin ölçüsünə, miqdarına diqqət yetirməlidir. Valideyn olaraq hər birimiz öz övladımızın düşüncəsinə yox, məktəbin, müəllimin uşağımıza verdiyi qiymətə, dəyərə istinad etməli və inanmalıyıq. Müəllim və valideynin birgə, əlbir fəaliyyəti şagirdi onlar arasında "manevr etmək", onları bir-birinə qarşı qoymaqla özünə bəraət atmosferi yaratmaq fürsətindən məhrum edər. 

Bu baxımdan orta məktəblərdə son dövrlərdə sürətlə yaranmaqda olan Valideyn-Müəllim Assosiasiyalarının (VMA) rolunu müsbət qiymətləndirmək lazımdır. Orta təhsildə məktəblə valideynin çiyin-çiyinə, bir-birinə dəstək verərək fəaliyyət göstərməsi ümumən cəmiyyətimiz üçün təhsilin inkişafında həddən artıq müsbət nəticələrə gətirib çıxara bilər. Müəllimin əməyinə verilən obyektiv və yüksək qiymətsə öz-özlüyündə şagird-müəllim, valideyn-məktəb münaqişələrinin də nəzərəçarpacaq dərəcədə azalmasına səbəb ola bilər.

Bəşəriyyətə gəlmiş-getmiş ən dahi insanlardan biri olan Əli bin Əbu Talibin gözəl bir fikrini hər zaman xatırlamaq lazımdır: "Mənə bir hərf öyrədənin quluyam". Cəmiyyətdə müəllimə yüksək dəyər verilməsi bir çox problemlərin həlli deməkdir. Belə olarsa, ümid etmək olar ki, gələcəkdə təhsilin inkişafına zərər verən situasiyalar tədricən minimuma enəcək və təhsildə şagird-müəllim-valideyn əməkdaşlığı daha da genişlənəcək".