"Həmrəylik” İctimai Birliyinin təşəbbüsü ilə tədbir keçirilib.  Tədbir "20 yanvar faciəsinin, gənclərin milli-mənəvi əxlaqına, düşüncəsinə təsiri” mövzusunda baş tutub.

İlk öncə Azərbaycan Respublikasının dövlət himni səsləndirilib və Quran tilavət olunub. Ardınca 20 yanvar şəhidlərinin ruhu 1 dəqiqəlik sükutla yad edilib. Tədbiri "Həmrəylik” İctimai Birliyinin sədri Rəşad Dadaşov açıb.

O, 20 yanvar faciəsinin xalqın yaddaşında əbədi iz qoyduğunu xatırladıb. 1990-cı il yanvarın 19-dan 20-nə keçən gecə Sovet hərb maşınlarının Azərbaycan xalqına qarşı dəhşətli faciə törətdiyini deyən Rəşad Dadaşov, hadisələrin Azərbaycan tarixinə qanla yazıldığını diqqətə çatdırıb. Faciəni qəhrəmanlıq salnaməmiz kimi xarakterizə edən "Həmrəylik” İctimai Birliyinin sədri, qətliamın xalqın mübarizə əzmini qıra bilmədiyini vurğulayıb. 20 yanvar faciəsindən sonra xalqın milli ruhunun və özünüdərkin gücləndiyini qeyd edib. Faciə zamanı 130-dan çox insanın qətlə yetirildiyini, 1000-dən artıq soydaşımızın yaralandığını deyən Rəşad Dadaşov, bu qətliamın heç zaman unudulmayacağına diqqət çəkib.
Ardınca çıxış edən "Əsgər Analarına Dəstək” İctimai Birliyinin sədri Növrəstə İbrahimova faciəni canlı olaraq yaşadığını deyib. Canlı şahid kimi həmin gecə baş verənləri, faciənin dəhşətini tədbir iştirakçılarının diqqətinə çatdırıb. O, çıxışında insanları birliyə, vəhdətə səsləyib və yalnız bundan sonra imperialistlərə qarşı mübarizə aparmağın mümkünlüyünü ifadə edib.

Tədbirdə AİP Gənclər Təşkilatının sədri Vüqar Abdullayev də söz alıb. O, xalqımızın başına açılan müsibətləri, yaşanan faciələri gələcəyimiz olan gənclərə çatdırmaq baxımından bu cür tədbirlərin keçirilməsinin böyük əhəmiyyətə malik olduğunu diqqətə çatdırıb. Bəzi gənclərin tariximizdə yaşanan faciələrdən xəbərsiz olduqlarını təəssüf hissi ilə qeyd edən Vüqar Abdullayev, bu istiqamətdən təbliğatın gücləndirilməsinin vacibliyini vurğulayıb.

"Ən gözəl yol, şəhadət yoludur” fikirləri ilə çıxış edən Azərbaycan İslam Partiyasının sədr əvəzi İlham Əliyev tədbirin keçirilməsində əməyi olan hər kəsə təşəkkürünü bildirib. Bu cür təfəkkür və düşüncə ilə gənclərin gələcəyinin parlaq olacağına diqqət çəkən İlham Əliyev, özünə inamın insanı qalibiyyətə apardığını deyib. Ən gözəl elmin, düşüncənin, peyğəmbər və Əhli-Beytin bizə çatdırdığı elm olduğunu vurğulayıb. Belə maarifləndirici tədbirlərin bundan sonra da keçirilməsinin zəruriliyini qeyd edib.

Sonra çıxış edən Ağ Blokun İdarə Heyətinin üzvü Əhəd Məmədli, Rüfət Hacıbəyli, AXP nümayəndəsi Fərid Zərdabi, VİP nümayəndəsi Ramil Nəcəfov, "Aydınlığa Doğru” Milli-Mənəvi dəyərlərin qorunması İçtimai Birliyinin nümayəndəsi şərqşünas, fəlsəfə üzrə fəlsəfə doktoru, gənc alim Elvüsal Məmmədov, Qədim Qala Nəşriyyatının baş meneceri Şöhlət İxtiyaroğlu, Azərbaycan İslam və Milli Hərəkat İctimai Birliyinin sədri Mehdi Şamilli, ilahiyyatçı Seyyid Elçin Musəvi və Elman Nəsrəddinov çıxış edərək mövzu ilə bağlı dəyərli fikirlərini bölüşüblər. 

Tədbirin sonunda 20 yanvar faciəsini əks etdirin video çarx nümayiş olunub.

Eyni halda sonda qonaqlara tədbirdən xatirə olaraq şəhidlərə aid təqvim və qələm verilib.