Kataloniyada ümumi tətil elan edilib
Kataloniyadakı həmkarlar ittifaqları oktybarın 1-də
regionun müstəqilliyi haqqında keçirilən "referendum" zamanı bu
prosesdə iştirak etmək istəyənlərlə polis arasında baş vermiş kütləvi
qarşıdurmalara etiraz olaraq ümumi tətil elan edib.
"Report" BBC-yə istinadən xəbər verir ki, etirazçılar Kataloniyada əsas
yolları bağlayırlar və bu, böyük tıxaclara səbəb olub.
Barselonanın ən böyük topdansatış ərzaq bazarı olan "Merkabarna"da fəaliyyət
göstərən, təxminən, 770 şirkət işini dayandırıb.
Həmkarlar ittifaqlarından Barselona dəniz limanının da fəaliyyətini
dayandırdığı bildirilib.
Etiraz aksiyalarında "Barselona" klubunun futbolçuları, eləcə də
universitet və muzeylərin əməkdaşları iştirak edir.
Qeyd edək ki, rəsmi Madrid daha əvvəl referendumun ölkə konstitusiyasına uyğun
olmadığını açıqlayıb.
