“Qarabağ” rəhbərliyinə Nardaran hadisələri ilə bağlı – Xəbərdarlıq

Avropa Liqasının qrup mərhələsinin V tur matçında İngiltərə "Tottenhem”ini qəbul edəcək "Qarabağ” klubunun rəhbərliyinə təhlükəsizlik məsələlərində daha diqqətli olmaları tövsiyə edilib.

Uluyol.info  xəbər verir ki, bu barədə report-a oyunun keçiriləcəyi Tofiq Bəhramov adına Respublika Stadionunun direktoru Şamil Quliyev məlumat verib.

O bildirib ki, klubun baş meneceri Asif Əsgərova Nardaranda baş vermiş olaylarla əlaqədar arenada təhlükəsizliyə ciddi riayət olunmasının vacibliyini söyləyib:

"Bu məqsədlə hüquq-mühafizə orqanlarının əməkdaşları daha diqqətli davranmalı, tamaşaçıları stadiona buraxarkən onları ciddi yoxlamalıdırlar”.

Direktorun sözlərinə görə, oyun zamanı təhlükəsizliyi qorumaq üçün kifayət qədər qüvvə cəlb olunacaq:

"Stadionumuzu "Qarabağ” icarəyə götürdüyündən, təhlükəsizlik məsələləri də klubun üzərinə düşür. Amma biz də əlimizdən gələn köməyi əsirgəməyəcəyik. Məndə olan məlumata görə, təhlükəsizliyi 5 000-dək polis əməkdaşı qoruyacaq. Eyni zamanda, daxili qoşunların xidmətindən istifadə olunacaq”.

"Qarabağ”ın mətbuat xidmətindən "Report”a verilən məlumata görə, indiyədək oyuna 19 000 bilet satılıb. Klub ümid edir ki, təhlükəsizlik sarıdan heç bir problem olmayacaq.

Qeyd edək ki, "Qarabağ” – "Tottenhem” matçı saat 22:00-da başlanacaq.