Müsavat seçicilərlə görüş-mitinqi keçirdi - FOTOLAR

Bu gün Yasamal rayonunda "Məhsul” stadionunda Müsavat Partiyası seçicilərlə görüş-mitinqi keçirib.

"Basta” xəbər verir ki, sözügedən ünvan 15 saylı Yasamal Seçki Dairəsinin ərazisidi. Həmin ərazidə Müsavat Partiyasının namizədi keçmiş başqan, Milli Strateji Düşüncə Mərkəzinin rəhbəri İsa Qəmbərdi. 
Görüş-mitinqində 15 saylı seçki dairəsinin seçiciləri və müsavatçılar iştirak edib.

Mitinq Bakı Şəhər İcra Hakimiyyətilə razılaşdırılsa da, siyasi məhbusların şəkilləri olan plakatlar meydana buraxılmayıb. Müsavat Partiyasının başqanı Arif Hacılı mitinqdə çıxışı zaman polisin siyasi məhbusların fotolarının mitinq iştirakçılarının əllərindən alınmasını tənqid edib.

"Görüş-mitinqin təşkilatçılarına siyasi məhbusların portretlərinin Məhsul stadiona keçirməsinə imkan verilmir. Hakimiyyət qondarma ittihamlarla həbs etdirdiklərinin hətta şəkillərindən də qorxur”, - deyə Arif Hacılı çıxışında bildirib. Bundan sonra mitinq iştirakçıları siyasi məhbusların fotoları olan və polisin əzdiyi plakatları geri alaraq istifadə ediblər.

İsa Qəmbər isə çıxışında hakimiyyəti doumuş məhlula bənzədib: "Hakimiyyət, Əliyev rejimi təkcə nefti, Azərbaycanın digər sərvətlərini oğurlamır, həm də bizim həyatımızı oğurlayırlar. Bu rejimin sonu gəlməkdədir. Bu rejimin başçıları özləri hər il "gələn il daha yaxşı olacaq” deyirdilər, amma indi İlham Əliyev etiraf edir ki, "gələn il çətin olacaq”. Bu rejim doymuş məhlula bənzəyir, özü-özünü inkar etməyə başlayıb”.
Mitinqdə Müsavatın yeganə qadın namizədi Dilşad Nağıyeva, partiyanın məclis sədri Nüşabə Sadıqlı, partiyanın 71 saylı Masallı Seçki Dairəsindən namizədi Xasay Fərzulla, 59 saylı Salyan Seçki Dairəsindən namziədi Valeh Hümmətoğlu, həmçinin Müsavatın 123 Kəlbəcər saylı seçki dairəsindən dəstəklədiyi, keçmiş Daxili işlər naziri İsgəndər Həmidov da çıxış ediblər.

 [