Ağcabədi rayon Məhkəməsinin hökmü ilə Sonolay.org saytının Baş redaktoru Ramil Məhəmmədoğlunun atası dünən (6mart) Məhəmməd Qurbanov 3 il müddətinə azadlıqdan mərhum edilib. Hakim Etibar Quliyevin sədirliyilə keçirilən prosesin yekununda Baş redaktorun atası Cinayət Məcəlləsinin 182 (hədə-qorxu ilə tələbetmə) maddəsilə təqsirli bilinib.
Jurnalist Ramil Məhəmmədoğlu əməkdaşımızla söhbətində faktı təsdiqləyib:
"Mənim atamın 60-a yaxın yaşı var. İndiyə qədər heç polisə belə izahat verməyib.
Hamı onu sakit, ziyalı adam kimi tanıyıb. Onun həbsi birbaşa mənim jurnalist fəaliyyətimlə
bağlıdır. Bu sifarişin arxasında hansı məmurların durduğunu yaxın günlərdə
açıqlayacam. Bir neçə ay əvvəl mən rəhbəri olduğum saytda Ağcabədi rayon məktəblərində
aparılan maliyyə yoxlamaları zamanı aşkarlanmış korrupsiya hüquqpozmaları və
digər neqativ hallara yol verildiyi barədə silsilə materiallar dərc etmişəm. Həmin
yazılarında Maliyyə Nazirliyi yanında Dövlət Maliyyə Nəzarəti Xidmətinin 10
saylı Regional müfəttişliyinin rəisi Ədalət Nəbiyev Ağcabədi məktəblərində
aşkarlamış maliyyə korrupsiyasını ört-bastır etmək üçün şöbə müdiri Mehdi Əhmədova
hansı qeyri-qanuni tapşırıqları verməsinə də toxunulub. Sözügedən şəxslər bir
neçə dəfə atamla əlaqə yaradaraq məni bu yoldan çəkindirməyə çalışıblar. Mən isə
prinsipial jurnalist mövqeyimə davam etmişəm. Bu səbəbdən də, həmin adamlar
çıxış yolunu mənə və atama böhtan atmaqda görüblər. Təəssüflər olsun ki, bu gün
mənim atamı barələrində ciddi jurnalist araşdırmaları apardığım və törətdikləri
çoxsaylı qanunpozuntularına görə tam ifşa etdiyim şəxslərin ifadələri əsasında
həbs etdilər. Mən Ağcabədi Məhkəməsinin atam barədə çıxardığı hökmü ədalətsiz
sayıram. Hökmdən daha yuxarı məhkəmə instansiyalarına, hakimin fəaliyyətindən
isə Məhkəmə Hüquq Şurasına şikayət edəcəyik. Yaxın günlərdə hadisələrin tam təfsilatı
barədə mediaya geniş açıqlama verəcəm”.(Azinforum.az)