"Bu tələblər jurnalistlər arasında ayrı-seçkiliyin yaranmasının qarşısını alacaq" -Səidə Şəfiyeva
"”Media Haqqında” qanunun tələbləri və Media Reyestrinin aparılması qaydaları hər kəsə şamil olunur”.
Bu sözləri Yenicag.az-ın mətbuatda uzun müddət fəaliyyət göstərən, peşəkarlığı və nüfuzu şübhə doğurmayan, lakin Media Reyestrində qeydiyyat üçün qoyulan bəzi tələblərə cavab verməyən jurnalistlərlə bağlı sualını cavablandıran MEDİA-nın Kommunikasiya və informasiya texnologiyaları departamentinin Kommunikasiya şöbəsinin müdiri Səidə Şəfiyeva deyib.
Onun sözlərinə görə, Media Reyestrinə aid tələblər jurnalistlər arasında ayrı-seçkiliyin yaranmasının qarşısını alacaq:
"”Media Haqqında” qanunun tələblərindən irəli gələn, eyni zamanda Media Reyestrinin aparılması qaydalarına uyğun olaraq hazırlanan tələblər hər kəsə şamil olunur. Yəni bu məsələdə hansısa ayrı-seçkilik edilmir. Əgər jurnalist qarşıya qoyulan tələblərə cavab verirsə, bu zaman Media Reyestrinə müraciət edə bilər və o, müsbət nəticə əldə edəcək”.
