Alimlər: "Yazda ağacların çiçəklənməsi
koronavirusa yoluxmanı artıracaq”
"Yazda yalnız havaların qızması səbəbindən deyil, həm də bitkilərin çiçəklənməsi səbəbindən koronavirus xəstəliyinə tutulma halları arta bilər”.
Musavat.com-un xarici KİV-ə istinadən verdiyi məlumata görə, bu barədə COVID-19 / POLLEN layihəsi çərçivəsində Beynəlxalq Elmlər Akademiyasının jurnalında yayımlanan təhlili məqalədə deyilir.
Alimlərin gəldiyi qənaətə görə, infeksiyanın səviyyəsi ilə havadakı tozcuqların konsentrasiyası arasında əlaqə var."Tədqiqat göstərir ki, bitkilərin baharda çiçəklənməsi 2020-ci ilin yazında Yerin şimali yarımkürəsində yerləşən ölkələrdə koronavirus infeksiyasının sürətlə yayılmasının səbəblərindən biri olubr. Eyni şey 2021-ci ilin yazında da baş verə bilər”, - məqalədə bildirilir.
Tədqiqatçılar xatırladır ki, hər il bitkilərin havaya mövsümi tozcuq buraxması respirator viruslara yoluxmanın pik vaxtına təsadüf edir:"Tozcuqların təsiri insanın antiviral interferon reaksiyasını azaltmaq hesabına bir sıra mövsümi respirator viruslara qarşı immunitetini zəiflədir. Biz araşdırdıq görək, infeksiya dalğası havada yüksək tozcuq konsentrasiyası ilə üst-üstə düşərsə, bunun antiviral interferonlara həssas olan SARS-CoV-2-yə (COVİD 19 –red.) də aidiyyəti olacaq, ya yox. Məlum oldu ki, ya istilik hesabına, ya da və rütubətlə birgə havada yayılan çiçək tozcuqları 44% halda yoluxmalara səbəbdir”.
Məqalədə o da bildirilir ki, sərt karantin rejiminin tətbiq edildiyi ölkələrdə analoji tozcuq konsentrasiyaları fonunda infeksiya səviyyəsi karantin tətbiq olunmayan ölkələrdən iki dəfə aşağı olub. Eyni zamanda, vurğulanır ki, insanın çiçək tozuna allergiyasının olub-olmamasından asılı olmayaraq, tozcuqlar onun koronavirusa qarşı həssaslığını artırır.