Tanınmış qarmon ifaçısı vəfat etdi

Musavat.com xəbər verir ki, bu barədə Hacı Nuran Hüseynov sosial şəbəkədə məlumat yayıb.

O, qeyd edib ki, musiqiçi bu gün 64 yaşında vəfat edib:"Bircə bu mart ayı tez keçsəydi... Hər günü bir acı xəbər, hər saatı ölüm qoxdu bu ayın. Son günü də acı xəbərlə açdım: illərlə tanıdığım insan, Azərbaycan musiqi sənətində xüsusi yeri olan qarmon ifaçısı Xanlar Cəfərov dünyasını dəyişdi. O qədər acı xəbər oldu ki... Sanki uçmuş bir dağın altındayam. İllərlə tanıdığım, sənətinə heyran olduğum insan idi Xanlar müəllim. Fitri istedad idi. O, qarmonu hər iki əli ilə eyni vaxtda çala bilirdi. Təkcə ifaçı deyildi, həm də bəstəkar idi. Bir çox oyun havalarını özü bəstələmişdi. Amma bunu çox az adam bilirdi. Xanlar Cəfərov tək-tük sənətkarlardan idi ki, Azərbaycan musiqi sənətinin ən nəhəng korifey insanlarını canlı görmüşdü. Uşaqlığı o insanların əhatəsində keçmişdi. Bakı toylarının bəzəyi idi. Elə özü də xan kimi insan idi. Təkcə sənəti deyil, ədəb-ərkanı da məktəb idi bu insanın. Xanlar Cəfərov əsl Azərbaycan kişisi idi. Bu gün bir yarpaq da əskildi musiqi sənətimizdən, bu gün əsl insan getdi aramızdan. Sənətkar, ata, dost kimi itirdik daha gözəl bir ziyalını. Yerin behişt olsun”.

Xanlar Cəfərovun ölüm səbəbi də məlum olub.

X.Cəfərovun musiqiçi dostları musavat.com-a bildiriblər ki, qarmon ifaçısı mart ayının 12-də Gəncədə toy məclisində iştirak edib. Həmin məclisdə soyuqladığı üçün onun səhhəti pisləşib və xəstəxanaya yerləşdirilib.

Bu gün xəstəxanada X.Cəfərovun qan təzyiqi qalxıb və həkimlər onun həyatını xilas edə bilməyiblər.

Könül, musavat.com