İtaliyada fövqəladə vəziyyət: Giriş və çıxış qadağandır
İtaliyanın Baş Naziri Cüzeppe Konte tərəfindən imzalanmış qərar görünməmiş məhdudiyyətlərə səbəb olacaq və aprelin 3-nə qədər qüvvədə qalacaq. Yeni qərar 16 milyon insanın yaşadığı ərazilərə giriş və çıxışla bağlıdır. Bu barədə "Reuters” agentliyi xəbər yayıb.
Yeni qaydaya əsasən İtaliyanın ən zəngin bölgəsi olan Lombardiya, həmçinin Venesiya, Modena, Parma, Piacenza, Reggio Emilia və Rimini şəhərləri də daxil olmaqla digər dörd bölgədəki 14 əyalətə giriş məhdudlaşacaq.
Baş nazir keçirdiyi mətbuat konfransında deyib ki, ciddi səbəb olmadan bu ərazilərə giriş və çıxış qadağan olunub. Yalnız fövqəladə vəziyyətlərdə müvafiq qurumların razılığı əsasında bu, mümkün ola bilər.
"Virusun yayılmasının və xəstəxanalarımızın ağzına qədər dolmasının qarşısını almalıyıq", baş nazir deyib.
Sərəncamın nə qədər sərt qaydada həyata keçiriləcəyi aydın deyil və bazar günü Milanın iki hava limanından və Venesiya hava limanından əvvəlki qaydada uçuşlar olub, dəmiryol operatorları hələ də qatar biletləri satmaqdadırlar.
Fərmana əsasən, bütün muzeylər, idman salonları, mədəniyyət mərkəzləri, xizək mərkəzləri və üzgüçülük hovuzları adıçəkilən bölgələrdə bağlanacaq. Tibb işçilərinin məzuniyyətə çıxması da yasaqlanıb. Səbəb kimi İtaliya xəstəxanalarında koronavirusla bağlı xəstələrin çox olması göstərilib.
24 saat ərzində koronavirusa 1200-dən çox italiyalının yoluxması hökuməti qəti addımlar atmağa təşviq edib.
İtaliyada yoluxucu virusdan ölənlərin sayı 36-dan 233-ə yüksəlib, reanimasiyada olanların sayı isə 567 nəfərdir. Əvvəlcə yoluxmuş 5,883 italiyalıdan isə 589 nəfəri tam sağalıb.
Lombardiyanın şimal bölgələri, Emilia-Romagna və Veneto koronavirusun ən çox yayıldığı yerlərdir. Bu virusa yoluxanların 85% və qeydə alınan ölümlərin 92% həmin ərazilərin payına düşür.
Elbəyi Həsənli, Sürix
Musavat.com
