Honq Konq: Xalq hökumətin
istefasını tələb edir -FOTOLAR
Çin əleyhinə 1 milyon nəfərlik mitinq keçirilib
Qərb mediasının əsas xəbər başlıqlarından biri Honq
Konqla bağlıdır. Bu şəhərdə 1 milyon nəfərdən çox insan nümayişə qatılıb.
Nümayişin səbəbi isə ölkə rəhbərliyinin yeritdiyi siyasətlə bağlıdır və siyasi
xarakter daşıyır. Söhbət ondan gedir ki, Çinin bir parçası olan Honq Konq XVII əsrdə
İngiltərənin əlinə keçib. Ancaq bu ərazi 1997-ci ildə Çin Xalq Respublikasına
qaytarılsa da bu bölgə xüsusi statusa malikdir və avtonom şəkildə fəaliyyət
göstərir. Burada əhalinin yaşayış səviyyəsi Çindən müqayisə olunmaz dərəcədə
üstündür. Honq Konqda insanların illik gəliri 40 min dollar civarındadır. Çində
isə günə 2 dollar qazananlar rəsmən kasıb hesab olunmur.
Rəsmi Pekin Honq Konqda öz nüfuzunu artırmaq üçün yerli siyasətçiləri ələ
almağa çalışır. Müxtəlif vasitələrlə onlara təsir göstərir.
Nümayişə səbəb olan məsələnin mahiyyəti belədir ki, Honq Konqda müəyyən cinayət
törətmiş şəxslər Çində məhkəmə qarşısına çıxarıla bilər. Yerli insanlar isə
bunu istəmir. Problem ondan qaynaqlanır ki, Çində kommunist diktaturası hökm
sürür, Honq Konq isə azad dünyanın qanunları ilə idarə olunur. Çin isə bununla
razı deyil və Honq Konqda da eyni rejimi yaratmağa çalışır. Bu isə yerli əhalini
ciddi şəkildə narahat edir.
Orası da var ki, Honq Konq iqtisadi baxımdan son dərəcə güclü ölkədir. Daxili Məhsulun
həcmi 400 milyard dollara çatır. 7 milyon əhalisi olan ölkə üçün iqtisadi
baxımdan dünyada 45-ci yerdə olmaq böyük göstəricidir. O da sirr deyil ki, Qərb
ölkələri Honq Konqa Çinlə mübarizədə ciddi dəstək verir. Onlar bu ölkənin
kommunistlərin nəzarət etdiyi düşərgəyə daxil olmasını istəmir.
Hazırda Honq Konqda siyasi böhran yaranıb. Xalq Çinin Honq Koqun daxili işlərinə
qarışmasına imkan verən qanun layihəsini ortaya qoyan hökumətin istefasını tələb
edir.
Elbəyi Həsənli, musavat.com