Borçalı Cəmiyyəti TÜRKSOY təşkilatının 25 illiyini qeyd etdi-FOTOLAR
Borçalı Cəmiyyəti 10-cu dəfə Gürcüstan Türklərinin Həmrəylik Bayramını keçirib.
Uluslararası Türk Kültür Təşkilatı -TÜRKSOY-un da 25 yaşına həsr edilən builki
mərasimdə Gürcüstan, Türkiyə, Güney Azərbaycandan olan ictimai- siyasi və elm
xadimləri, sənətçilər, Ahıska Türklərinin təmsilçiləri iştirak etdilər.
Dövlət
himnimiz səsləndikdən sonra Azərbaycan, Gürcüstan və Türkiyənin ərazi bütövlüyü
uğrunda şəhid olanların xatirəsi bir dəqiqəlik sukutla yad edilib. Mərasimin
aparıcısı Rüfət Muradlının qısa çıxışından sonra Borçalı Cəmiyyətinin fəaliyyətinə
və TÜRKSOY-a həsr olunmuş video filmlər göstərilib. Axıska türklərinin "Vətən”
Cəmiyyətinin yeni sədri İsmayıl Rəhimovu, Gürcüstandan gəlmiş ictimai-siyasi
xadim Əhməd İmamquliyevi və digər qonaqları salamlayan Borçalı Cəmiyyətin sədri
Zəlimxan Məmmədli çıxışında ötən həmrəylik bayramından keçən bir il ərzində
görülən işlər, uğurlar haqda danışıb, TÜRKSOY təşkilatını təbrik edib və
Borçalı Cəmiyyətinin gələn il üçün fəalliyət istiqamətləri haqda mərasim
iştirakçılarına məlumat verib. O bildirib:”Biz 10 ildir kimsədən yardım gələcəyinə
ümid bəsləmədən millətimizə, elimizə güvənərək bəlli məsafə qət edə bilmişik.
Bununla Azərbaycan insanının potensialının tükənməz və güclü olduğuna bir daha əmin
olaraq altı qızıl xətlə cızılan hadisələr yarada bilmişik. TÜRKSOY təşkilatının
Borçalını tanıtma proqramı tarixi hadisə olmaqla Borçalı türklərinin Türk
dünyasına inteqrasiyasında çox əhəmiyyətli bir qapıdır. TÜRKSOY ailəsinə, şəxsən
baş katib Dusen Kaseinov cənablarına adınızdan təşəkkür etməklə bildirirəm ki,
iş birliyimiz davam edəcək və ən yaxın bir zamanda özü şəxsən Borçalı Cəmiyyətinin
qonağı olacaq. Eyni zamanda Borçalı Cəmiyyəti Azərbaycan türklüyünün mənəvi cəhətdən
ayrılmaz bir parası olan Borçalı türkləri adından, öz daxili imkanları ilə
Bakının erməni-bolşevik işğalından təmizlənməsində müstəsna rol oynamış Qafqaz
İslam Ordusunun komandanı Nuru paşanın büstünü qoymaqla yenə də insan amilinin
qüdrətini əyani nümayiş etdirdi. Biz bundan sonra da insan resursumuzun gücünə,
ədalətin, haqqın gücünə güvənərək başlatdığımız müqəddəs yolu davam etdirmək əzmindəyik.
Hər birinizi bu bayram münasibəti ilə təbrik etməklə bəyan edirəm ki, yenə də
özümüzə güvənərək növbəti ilin prtalarına qədər Borçalı Ensiklopediyasının ən
azı birinci cildinin nəşrinə nail olacağıq.”
Daha sonra İlin Şərəf Medalları sahiblərinə təqdim edilib. Borçalı Cəmiyyəti İH
-nin 15 dekabr qərarına əsasən səmərəli elmi və ictimai fəaliyyətinə görə
İsaxan İsaxanlı, Knyaz Aslan, Vahid Ömərov, Əsəd Təhləli, Bədirxan Əhmədov, Məmməd
Sarvan , Şahbaz Musayev eləcə də Borçalı Cəmiyyətində qoyulan Nuru Paşanın
büstünün müəllifi Zirəddin Quliyev İlin Şərəf medallarına layiq görülüblər.
Borçalı Cəmiyyətinin builki Türklüyə Xidmət Ödüllərinə TÜRKSOY təşkilatının baş
katibi Düsen Kaseinov və Türkiyədə yaşayan görkəmli heykəltəraş Səid Rüstəm
layiq görülüblər. Bayram mərasimində Borçalı Cəmiyyətinin xüsusi hədiyyələri
Gürcüstanın tanınmış siyasi simalarından Əhməd İmamquliyevə, Aşıq Şahbaz Göyçəoğluna
Axiska Türklərinin Vətən Cəmiyyətinin sədri İsmayıl Əliyevə, Milli Mədəniyyətin
Təbliği İB -nin sədri Jalə Cəfərovaya, Kəpənəkçi Xeyriyyə Fondunun sədri Azər
Göyüşova, Güney Azərbaycan Konqresinin sədri Abdulla Əmir Haşimi Cavanşirə də təqdim
olunub. Tədbirdə Əhməd İmamquliyev çıxış edərək Borçalı Cəmiyyətinə bu möhtəşəm
görüşə görə təşəkkürünü bildirməklə Gürcüstanın siyasi həyatında sona qədər var
olacağını, Azərbaycan-Gürcüstan strateji tərəfdaşlıq münasibətlərinin daha da
inkişafı üçün mübarizə aparacağını bildirib.
Gecədə həmçinin Güney Azərbaycan Konqresinin təsis etdiyi Seyid Cəfər Pişəvəri
mükafatı da sahiblərinə təqdim edilib. Tanınmış alim Esmira Fuad və sənətçi Həsən
Cəbrayılov mükafatlara layiq görülüblər. Uluslararası Türk Kültürü Təşkilatının
25 illiyinə həsr edilən Həmrəylik Bayramı mərasimində mükafatlananlarla bərabır
Borçalının El ağsaqqalları və görkəmli ziyalılar Abbas Abdulla, Osman Əhmədoğlu,
Mədəd Coşqun, Elxan Məmmədli, professor Telman Əliyev, tarix elmləri doktoru
Mahal Qacar da Borçalı Cəmiyyətinə öz xeyir dualarını veriblər. Bayram mərasimi
Aşıq Cahangir , Şüşa Elat Muğam Üçlüyünün solisti Bəxşeyiş Mehdiyev, Ariz
Hüseynov, Xəlil Qaraçöp və Xudafərin ansamblının çıxışları ilə davam edib.