Kərküklü qonaq BAO-nu ziyarət etdi
Bakıda səfərdə olan İraq Türkmən Cəbhəsinin mətbuat
katibi, Türk Dünyası İlətişimcilər Birliyinin Türkməneli Başqanı Turqut
Hürmüzlü 12 mart 2018-ci il tarixində Bütöv Azərbaycan Ocaqlarını ziyarət etdi.
Uluyol.az-ın xəbərinə görə, BAO-nun qərargahında baş tutan görüşdə təşkilatın
Başqanı Zahir Əlisoy, BAO Başqanının İdeoloji məsələlər üzrə müavini, tarix üzrə
fəlsəfə doktoru, dosent Dilavər Əzimli, Siyasi məsələlər üzrə müavini, tarix
üzrə fəlsəfə doktoru Alı Balayev, Türk Dünyası ilə Əlaqələr üzrə müavini, fəlsəfə
üzrə fəlsəfə doktoru, dosent Faiq Ələkbərli, Təşkilati məsələlər üzrə müavin
Araz Şamil, BAO-nun Türk Dünyasını Araşdırmalar Qurumunun rəhbəri, pedaqogika
üzrə fəlsəfə doktoru Eldəniz Abbaslı, İcra Aparatının üzvləri, Ceyhun Quliyev və
Şahin Bəkirli iştirak edirdilər.
Səmimi bir şəraitdə baştutan görüşdə öncə qonağa Bütöv Azərbaycan Ocaqlarının
ümumi iş prinsipləri, fəaliyyət formaları haqqında məlumat verildi.
Daha sonra Güney Azərbaycan, Türkməneli, Kərkük və ümumilikdə Türk Dünyası məsələlərində
BAO-nun mövqeyi izah edildi.
Görüşdə həmçinin Türkmənelində, Kərkükdə, o cümlədən Türk dünyasında son dönəmlər
cərayan edən siyasi proseslər haqqında fikir mübadiləsi aparıldı.
Turqut Hürmüzlü BAO Başqanı Zahir Əlisoya və Türk Dünyasını Araşdırmalar
Qurumunun rəhbəri, pedaqogika üzrə fəlsəfə doktoru Eldəniz Abbaslıya İraq Türkmən
Cəbhəsi başqanı Ərşad Salihin "Əməyinizə təşəkkür edərik” plaketini təqdim
etdi.
BAO adından Turqut Hürmüzlüyə və İraq Türkmən Cəbhəsi başqanı Ərşad Salihiyə
çatdırmaq üçün Azərbaycan Bayraqları və BAO emblemi həkk olunmuş
boşqablar hədiyyə edildi.