"Bağışla məni, Qadın"

Bağışla məni, Qadın,
işə saldım səni...
mən bütün xoş olanları,
əzizləmələri, oxşamaları
sənə qədər deyib urvatdan salmışam.
indi səninlə görüşəndə, danışanda, sevişəndə
sənə deyə bilmirəm
- canım;
- ürəyim, gözüm;
- əzizim;
- əziz-təbərrikim;
- ürəyimin içi;
- ömrüm;
- həyatım;
- gözəlim;
- bir dənəm;
- şirinim;
- şəkərim;
- dadlım;
- mələyim;
- xilaskarım;
- sevdiyim;
- sevgilim;
- ömrümün qadını,
(hələ rusca, talışca variantları da var)
əlqərəz, sözlərin ən gözəlini
pay-püş etdim... fahişələrə!
Sənə naz üçün dildə söz,
canda tab qalmadı.
Yaman bədxərclik etdim,
Ömrün illəri də getdi, sözləri də.

Bağışla məni, Qadın,
səni oyuna saldım
yanına içiboş, ruhu sərxoş gəldim.
Gəldim ki, deyəm:
bütün qadınlara -
məndən "sevirəm" uman...
hər kəsə "sevirəm" dedim.
Yalan demirəm, yalandan demirəm:
istədikləri hər şeyi verdim,
istədikləri hər şeyi aldılar...
bircə ürəyimdən başqa!
"Mən səninlə xoşbəxtəm"
dedikləri anda bitdi xoşbəxtlikləri!

Bağışla məni, Qadın,
səni əzaba saldım,
mənə inanmağın çətin:
sevirəm dediklərimin üstünə dəhrə-yabayla getdim,
el-aləm içində baş qaxınclarına döndüm,
etdiklərimi burunlarından gətirdim,
polis şöbələri, məhkəmə, türməm də əskik olmadı!

Bağışla məni, Qadın,
tərpətdim içini, oynatdım duyğularını,
sənə qədər dedim hər gördüyüm fahişəyə:
- ömür payım!
- ruh əkizim!
- sən hardaydın?
- "cənazə namazını qıldım bütün qadınların"
- bilsəydim sənə rast gələcəm, indiyəcən heç kimi sevməzdim.

Həə, dedim mən, əclafcasına səmimiyyətlə dedim!
Sonra parazitə, həşərata döndüm həyatlarında!

Bağışla məni, Qadın
mən sözlə sevdim, sözlə oynadım!
Səni oynatmağa, sevməyə sözüm yox!

Bağışla məni Qadın,
anlaya bilsən, xoşbəxt olaram:
mən qarşıma çıxan qadınların günahlarının cəzasıyam!

Sən hardan gəldin?
Sənin günahın nəydi?
İnanaqmı, aldanaqmı:
Mən sənin saflığının mükafatıyam,
yoxsa sən mənim əzablarımın?
Bəlkə sən də günahkarsan,
bu da növbəti faciə?

Bağışla məni Qadın,
sənin üçün ancaq gözlərim qalıb,
bax gözlərimə...
bir də heç kimə vermədiyim ürəyimə!
Bəs etmədisə...
ömrümün qalanını da götür qoy üstünə
apar tulla zibil yeşiyinə.
...Səndən ayrılıb durub getməyə ünvanım yox.
Dünya bir qadın qədər kiçik,
dünya bir qadın qədər böyük!

Bağışla məni, Qadın...
qoy heç olmasa cəsarətin
kabusuna döndüyüm
qadınların qisası olsun!

Bağışla məni, Qadın,
ya sevgilim ol, ya qatil!

Bağışla məni, Qadın...
səni tək qoymaq istəmədim!


   Aydın CANIYEV

 

                                                                            Uluyol.az

 

Sayt haqqında

"Kütləvi informasiya vasitələri haqqında Azərbaycan Respublikasının Qanunu"na əsasən KİV qanunla qadağan olunmuş mənbələr istisna olmaqla, istənilən vəsaitlər hesabına maliyyələşdirilə bilər (Maddə 6-1), KİV üzərində dövlət senzurasına, habelə bu məqsədlə xüsusi dövlət orqanlarının və ya vəzifələrin yaradılmasına və maliyyələşdirilməsinə yol verilmir (Maddə 7), KİV cəmiyyətdəki iqtisadi, siyasi, ictimai və sosial durum haqqında, dövlət orqanlarının, bələdiyyələrin, idarə, müəssisə və təşkilatların, ictimai birliklərin, siyasi partiyaların, vəzifəli şəxslərin fəaliyyəti barədə operativ və doğru-dürüst məlumatlar almaq hüququna malikdirlər (Maddə 8)

ULU YOL xəbər agentliyi 2015
Təsisçi və Baş redaktor:   Saday Fərəcov
Tel:                    +994 70 215 78 15
E mail:                    uluyol.az@gmail.com
Hazırladı: Vüsal Əli

Fatal error: Uncaught Error: [] operator not supported for strings in /home/uluyol/domains/uluyol.info/public_html/index.php:300 Stack trace: #0 {main} thrown in /home/uluyol/domains/uluyol.info/public_html/index.php on line 300