“Uşaq bağçasında məndən 200 manat rüşvət istəyirlər”

Xırdalan şəhəri, 30-cu məhəllə "Kristal Abşeron” şəhərciyində yaşayan Əhmədov Yusif İmran oğluredaksiyamıza şikayətlə müraciət edib.

Yusif Əhmədov 3 yaşlı qızını uşaq bağçasına qoymaq istədiyini, amma ondan rüşvət istənildiyini bildirir.

"Xırdalanda olan bütün bağçalarına müraciət etmişəm. Amma hamısında deyirlər ki, yer yoxdur. Amma mənə eşitdiriblər ki, 200 manat müqabilində uşağı bağçaya düzəldə bilərik”.

Qeyd edək ki, bu qəbildən olan şikayətlər çox olsa da, Azərbaycanda uşaq bağçalarına rüşvət halları nadir hallarda ifşa edilir.

Bundan əvvəl mətbuatda Xırdalan şəhər 17 saylı uşaq bağcasının direktorunun qanunsuz hərəkətləri barədə şəhər sakininin Baş prokuror yanında Korrupsiyaya qarşı mübarizə idarəsinin "161-Qaynar xətt” əlaqə mərkəzinə daxil olmuş müraciəti araşdırılıb.

Müəyyən edilib ki, bağcanın direktoru Lalə Əmirova xidməti səlahiyyətlərinin icrası ilə əlaqədar Xırdalan şəhər sakininin azyaşlı qızının bağçaya qəbul olunmasına görə 200 manat məbləğində pul tələb etmiş, həmin məbləğin 100 manatını 2012-ci ilin dekabr ayında azyaşlının bağçaya qəbul edilməsi üçün zəruri olan sənədlərlə birlikdə rüşvət kimi alıb.

Əmirova cinayətkar əməllərini davam etdirərək 4 mart 2013-cü il tarixdə xidməti otağında 60 manat məbləğində pulu rüşvət kimi alarkən Baş prokuror yanında Korrupsiyaya qarşı mübarizə idarəsinin əməkdaşları tərəfindən cinayət başında yaxalanıb.

Baxış zamanı onun üzərindən rüşvət kimi aldığı 60 manat, şəxsi pul kisəsindən 1.494 manat və 40 avro məbləğində pul, xidməti otağından digər sənədlər aşkar edilərək maddi sübut kimi götürülüb.

Əmirova Cinayət Məcəlləsinin 311.1-ci (rüşvət alma) maddəsi ilə təqsirləndirilən şəxs qismində cəlb edilərək ona həmin maddə ilə ittiham elan olunmuş və məhkəmənin qərarı ilə vəzifədən kənarlaşdırılmaqla polisin nəzarəti altına vermə qətimkan tədbirləri seçilib.