Müsavat Novxanıda möhtəşəm mitinq keçirdi – FOTO, VİDEO

Bu gün Müsavat Partiyası Novxanı kəndində Azərbaycan Xalq Cumhuriyyətinin banisi Məmməd Əmin Rəsulzadənin anadan olmasının 133-cü ildönümü münasibəttilə mitinq keçirdi.

Mitinqdə Müsavat başqanı Arif Hacılı, MSDM-in sədri İsa Qəmbər, Rəsulzadə irsinin araşdırıcısı Nəsiman Yaqublu, Müsavat başqanın müavinləri Yadigar Sadıqov və Səxavət Soltanlı, professor Almaz Əliqızı və D18 Hərəkatının sədri Ruslan İzzətli çıxış etdilər.

Çıxışlarda Xalq Cumhuriyyətinin yaradılmasında Rəsulzadənin rolu vurğulandı.

Müsavat başqanı Arif Hacılı öz çıxışında havanın soyuq olması və qar yağmasına rəğmən mitinqin izdihamlı olduğunu bildirdi. Müsavat Partiyası üzvlərinin Rəsulzadə yolunu mərdliklə davam etdirdiklərini və ölkədə tezliklə hakimiyyətin dəyişəcəyini vurğuladı.

Tədbirdə iştirak edən uşaqların ifasına Azərbaycanın müstəqilliyinə həsr olunmuş şeirlər dinlənildi. Aksiya Müsavatın himninin oxunması ilə başa çatdı.

Mitinqdə sonra aksiya iştirakçıları Rəsulzadənin Novxanı qəbirstanlığında uyuyan qohumlarının məzarlarını ziyarət etdilər.

Mustafa Hacıbəyli, bastainfo.com