Tripoli sahillərində qayıq qəzası nəticəsində 100-ə yaxın mühacir itkin düşüb

            Tripoli sahillərində qayıq qəzası nəticəsində 100-ə yaxın mühacir itkin düşüb

AZƏRTAC xəbər verir ki, İtaliyanın "Repubblica” qəzetinin yaydığı məlumata görə, insident Tripolidən şərqdə qeydə alınıb. Liviyanın sahil mühafizə xidməti indiyədək yalnız 14 nəfəri xilas edə bilib.

Qəza zamanı qayığın göyərtəsində ümumilikdə 120-yə yaxın insanın olduğu bildirilir.

Afrika və Yaxın Şərq ölkələrində baş verən bir sıra silahlı münaqişə və iqtisadi problemlər səbəbindən Avropa II Dünya müharibəsindən bəri ən böyük miqrasiya böhranı ilə üzləşib. Beynəlxalq Miqrasiya Təşkilatının məlumatına əsasən, 2018-ci ilin əvvəlindən iyunun 20-dək dəniz yolu ilə Avropaya 41 min mühacir gəlib. Bu yolla ölkəsini tərk etməyə cəhd göstərən 960 nəfər isə Aralıq dənizində həyatını itirib. 2017-ci ilin analoji dövrü ərzində Avropaya 85 minə qədər mühacir gəlmiş, 2133 nəfər dənizdə batmışdı.