Qaçqın separatçıdan xəbər çıxdı

                               Qaçqın separatçıdan xəbər çıxdı

Muxtariyyət statusu olan Kataloniya vilayətində oktyabrın 1-də keçirilmiş qanunsuz referenduma qatılanların 90 faizindən çoxu bölgənin müstəqil dövlət elan olunmasına tərəfdar çıxıb. Bu nəticələri əsas tutan Kataloniya parlamenti oktyabrın 27-də bölgəni müstəqil dövlət elan edib.

Oktyabrın 28-də rəsmi Madrid Kataloniya hökumətini və parlamentini buraxıb, idarəçilik səlahiyyətlərinin mərkəzi orqanlara ötürülməsi, dekabrın 21-də vilayətdə yeni parlament seçkisinin keçirilməsi barədə qərar çıxarılıb.

Vilayətin başçısı (prezident) Karles Puçdemont da vəzifədən götürülüb, Kataloniyaya rəhbərlik baş nazirin birinci müavini Sorayya Saensə həvalə olunub.

Karles Puçdemont oktyabrın 30-da İspaniyanı tərk edərək Belçikanın paytaxtı Brüsselə sığınıb. Novator.az-ın məlumatına görə, qiyamda təqsirləndiriləcəyi gözlənən Karles Puçdemont oktyabrın 31-də Brüssel Mətbuat Klubunda jurnalistlərlə görüşüb. O deyib ki, Kataloniya hökuməti Madridlə dialoq qurmağa cəhdlər göstərib, ancaq İspaniya hökuməti ilə razılaşmanın mümkünsüzlüyünü anlayanda müstəqilliyi bəyan etməyə məcbur olub.

Karles Puçdemont Belçikadan siyasi sığınacaq istəyəcəyi ilə bağlı iddiaları təkzib edib: "Mən Brüsselə Avropa ilə danışmağa gəlmişəm. Kataloniyanın qanuni başçısı kimi bölgədə nələrin baş verdiyini bölüşmək istəyirəm”.

Karles Puçdemont dekabrın 21-nə təyin olunmuş növbədənkənar parlament seçkisinin istənilən nəticəsini qəbul etməyə hazır olduğunu vurğulayıb, qeyd edib ki, Madrid də Kataloniya xalqının öz iradəsini ifadə etməsinə hörmətlə yanaşmalıdır.